1 Samuel 15
1Vatei mun, Samuel bemei visal Sol e biteni mini bitene, “Tetiamu, Iahova tesa nou natehat natetuxol xatuk tengan mei uhe suv toto na moletin nan xil. Ma taxeak, uteong ni nou melele xa nihit usil naha xa Iahova te Xeihen ien bei nihiteni minuk. 2Iahova isa longpangasien mi mol-Amelek xil vengan xa avu nae xil latevae tetal mol-Isrel xil melele xa xil lathe reling hal Isip latemei. 3Muha muvae itel mol-Amelek xil e muhu len holesok nae xil vus. Muhas vin moletin xil vus: tiramue xil, atou xil, tutut horamue xil, e tuvava xil mun. Buluk xil, sipsip xil, kamel xil e dongki xil mun, muhas vuol ni xil. Munaling ti neta nameul.”4Ma Sol mikes viton moletin nan xil xa lapin tengan lavae ba labe vituei e taon tahal Telaim. E melele xa buli xil, mikameti xa mol-Isrel xil labe handred taosen lu (200,000) e mol-Sudah xil labe taosen he xalu (10,000).
7Melele xa Sol e moletin nan xil labae del mol-Amelek xil, labas vuol ni xil vari, nggo taon tahal Havila ba duxoh taon tahal Sur xa de haxot te tan tahal Isip xa de ist. 8Labas vin moletin xil vus, e suv toto nae xa hisen Akak, lapo xati meul tang. 9Reitin, Sol e moletin nan xil latavas vin suv toto Akak ti. E sipsip e buluk xil xa vexil bos, ngan xa latellep mu tuten xil, latavas vin xil ti. E melele xa lapus neta tei xa bos mak mu, lalehi vengan xa iexil ti tavei lapurun ni. E holesok xil xa lapusi labit misa mu pupuru tang, xil lapurun pupu ni.
10Di, Iahova biteni mi Samuel bitene, 11“Nalonge misa pupu xa natepol ni Sol mei be suv toto. Xi biles reling nou e tahusil xat sepinien navan xil ti.” Ma melele xa Samuel milonge mak, milonge misa ma nggulehi di misis mi Iahova ba vuma ... ut milan.
12Makoe tamu nousav, xi ba milang ni Sol. Xi milongeong ni xa Sol tehe taon tahal Karmel e teling hat tei tehe simelele tengan moletin xil linem xat xeihen nan e vaeen nan. Di, teha sung tehe Kilkal. 13Ma Samuel be Kilkal e mikamet Sol en. E melele xa Sol pusi, biteni mini bitene, “!Samuel, Iahova ituxol xatuk. Inou napol vuol ni holesok xil xa Hi tehiteni tengan nipol ni.”
14E Samuel misisi bit, “?Vahit vamak, ma veneh iaxa di nalong buluk xil di lamuis e sipsip xil di latangal?”
15Sol bit rilomun ni mini bit, “Moletin navan xil laleh rerat xil ra mol-Amelek xil. Xil laling pilei sipsip e buluk xil xa labos tengan ha lisa ni mi Iahova, Hi nam. E ngan tesav xil, matemu len xil vus.”
16Samuel misel xati bit, “Uta tamu votei, e inou nihit naha xa Iahova tehiteni minou e vongien.”
E Sol bit, “Bos. Hiteni minou.”
17Ma Samuel bit rilomun ni mini bitene, “Tave ti neta xa diamu, otenem mele ni xouk, xosali mei obe vat na vatimol xil vus na mol-Isrel xil. Iahova iaxa tetuxol xatuk mei obe suv toto na mol-Isrel xil vus. 18E xi tesilak ba otepol ni polien tei nan. Xi en tehei xa uhas vuol ni moletin tesa xil tahal Amelek. Xi tehiteni minuk tehit uvae vuma ... uhas vin xil tevusien. 19?Xosxa mak, ma veneh ma otalong xat ti sepinien nan? ?Veneh ma otetemanon oteha oteleh holesok nae xil xa tehos? !Naha xa otepol ni tesa pupu pe met Iahova!”
20E Sol bit rilomun ni mini bit, “Inou natelong xat sepinien na Iahova reitin. Nateha texoni ngan xa xi tehiteni minou, natehas vin moletin xil vus tahal Amelek e natehur suv toto Akak temei inggak. 21E moletin navan xil latavas vin ti sipsip e buluk sae xil xa bos. Xil labit lileh xil limei inggak, e taon tahal Kilkal, tengan mei lisa ni mi Iahova, Hi nam.”
22E Samuel biteni mini bit, “?Naha iaxa Iahova ien bei mak mu? ?Longxatien mu sanien xil? Xosxa xir di ralong xat sepinien nan xil, ma ngan ak ihos mak mu ili ngan xil risa sanien xil tang mini. 23Tesaen te vatxeihen pipin ni tesaen te eimas. E sexien te koaien nggoni sexien te moten mi hi sav xil. Ma vengan xa otesin sepinien xil na Iahova, xi mun di misin lelaxatien nam mi mol-Isrel xil.”
27Melele xa Samuel misepin bus, biles tengan vaha, e Sol milonge misa e dal xat eising nan ma dal pasi. 28Melele xa Samuel pusi mak, biteni mi Sol bitene, “Nggoni ngan xa opol ni ni eising navan, xosali, Iahova dal pas lelaxatien nam mi mol-Isrel xil be relinguk e isa ni mi tua tei nam xa be moletin hos mili xouk. 29Iahova na mol-Isrel xil xa hisen be nesao misakras vahiles nenemien nan. Xi taxoni moletin ti xa di miluvos e di biles nenemien nan.”
34Ma Samuel dilomun be Ramah, e suv toto Sol dilomun be tim san e Kibea. 35E melengien ak ba duxoh hoxalite te meulien na Samuel, xi tapus ti mun Sol. E vehakut, di en misa en. E Iahova mun milonge misa vengan xa xi iaxa tehosei Sol mei tehe suv toto na mol-Isrel xil.
Copyright information for
TVK